Warar dheeraad ah ayaa laga helayaa qarax miino ah oo ka dhacay Magaalada Gaalkacyo ee Xarunta Gobolka Mudug dhinaca Maamulka Puntland, kaasi oo jugtiisa laga maqlay xaafado ka tirsan Magaaladaas.
Qaraxaas ayaa waxaa lala eegtay Bar koontarool oo ay ku sugnayeen Ciidamo ka tirsan kuwa Booliska Maamulka Puntland ee ka howlgala Gaalkacyo, kuwaasi oo qaraxa kadib rasaas u furay dhowr jiro.
Dad ayaa soo weriyay in miinada lagu aasay laamiga dhinaciisa gaar ahaan meel aad u dhow Koontarool ay leeyihiin Ciidanka Booliska Maamulka, waxaana la sheegay inuu ka dhashay khasaaro qaraxa.
Al-shabaab ayaa sheegtay in laba Askari oo kamid Ciidanka Booliska Puntland ay ku dhaawacmeen qaraxaas, kuwaasi oo la geeyay Xarun Caafimaad, si xaaladooda Caafimaad loogu dabiibo, iyadoo la xusay in dhaawacyada ay yihiin kuwo fudud.
Laamaha amniga Magaalada Gaalkacyo ayaa weli wax war ah kasoo saarin qaraxii ka dhacay, hayeeshee falkaas ayaa kamid noqonaya falal amni darro oo horey uga dhacay Magaalada, ayna Mas’uuliyadooda sheegteen Al-shabaab.
