Gacan ka hadal kadhashay muran dhul ayaa sababay dhimashada laba ruux iyo dhaawaca laba kale, kaas oo ka dhacay deegaanka Bidhaan-dheere oo hoostaga magaalada Dhuusamareeb. Colaaddan oo muddo soo taagneyd, ayaa salka ku haysay guri halkaas laga dhisayey, kaas oo muran xooggan uu ka dhashay lahaanshihiisa.
Muran dhuleedkan ayaa muddo dheer soo jiitamayey, waxaana xiisadda ugu dambeyntii isku beddeshay gacan ka hadal sababay dhimasho iyo dhaawac. Labada qof ee ku geeriyooday iyo labada kale ee ku dhaawacmay, ayaa dhammaantood ka mid ahaa dadka deegaanka oo ku lug lahaa muranka ka dhashay dhismaha guriga.
Laamaha amniga ee Galmudug ayaa si degdeg ah u soo gaaray goobta ay mashaqadu ka dhacday, iyagoo doonaya inay xakameeyaan colaadda sii xoogaysanaysa. Ciidamada ayaa isku dayay inay kala dhex galaan dhinacyada isku haya dhulka, si ay u joojiyaan dhiigga daadanaya. Inkastoo ciidamada amniga ay goobta ku baxeen, haddana rabshadihii dhacay ayaa sababay khasaarahaas ba’an.
Dadka deegaanka Bidhaan-dheere ayaa sheegay in muranka dhuleed uu muddo dheer ahaa mid taagan, iyagoo ku eedeeyay dhinacyada isku haya dhulka in ay ka gaabiyeen in muranka la xalliyo iyadoo la adeegsado wada-xaajood iyo heshiis nabadeed. Colaaddan ayaa sidoo kale abuurtay cabsi dheeraad ah oo ku saabsan in xiisadda ay ka sii darto, haddii aan si degdeg ah loo helin xal waara oo murankaas lagu dhammeeyo.
Dowlad Goboleedka Galmudug ayaa lagu wadaa inay qaaddo tallaabooyin dheeraad ah oo lagu dejinayo xaaladda, iyadoo la filayo in odayaasha dhaqanka iyo madaxda deegaanka ay ku lug yeeshaan dadaallada lagu xallinayo khilaafka dhuleed, si looga hortago colaado kale oo ka dhasha muranka dhulka.
