Waxaa maanta oo jimco ah qabuuro ku yaalla deegaanka Jazeera ee duleedka Koonfureed ee magaalada Muqdisho lagu aasay Allaha u naxariistee marxuumad Luul Cabdicasiis oo bil kahor u geeriyootay dhaawac halis ah oo kasoo gaaray dab uu qabadsiiyay ninkii qabay.
Meydka Marxuumad Luul Cabdicasiis ayaa bil ku jiray qaboojiye yaalla Isbitaalka Racep Tayyib Erdogan (Digfeer) ee Muqdisho, halkaasi oo la geliyay markii ay u geeriyootay dhaawaca dabka uu u geystay Sayid Cali Macalin Daa’uud oo seygeedii ahaa.
Boqolaal dadweyne ah ayaa ka qeyb galay tukashada salaada janaasada iyo aaska loo sameeyay Luul Cabdicasiis oo aheyd hooyo uur lahyed, isla markaana la gubay, xilli ay joogay gurigeeda oo ku yaalla degmada Wadajir ee Gobolkaan Banaadir.
Dadkii ka qeyb galay aaska oo kamid ahaayeen qoyska marxuumada iyo eheladeeda ayaa dhamaantood Alle uga baryay inuu u naxariisto Luul, janatul firdowsana ka waraabiyo, Marxuumada ayaa ifka kaga tagtay lix carruur ah oo ay dhashay.
Si kastaba, aaska marxuumadda ayaa ku soo beegmaya maalmo kadib markii maxkamadda gobolka Banaadir ay dil toogasho ah ku xukuntay Sayid Cali, ayada oo qoyskeeda ku adkeysteen in aan gabadhooda la duugeyn inta ay caddaalad ka heleyso.
