Ciidanka Nabadsugida Gobolka Banaadir iyo ciidanka Booliska dowladda Federaalka ayaa xalay howlgalo saacado qaatay waxaa ay ka sameeyeen xaafaddo ka tirsan degmada Wadajir gaar ahaan xaafaddaha ku dhow Garoonka diyaaradaha Aadan cadde.
Howlgalka ayaa inta uu socday waxa ay ciidamada Booliska iyo kuwa Nabadsugida ay ku baarayeen guryaha, iyagoona kusoo qab-qatay dad u badan dhallinyaro oo looga shakiyay inay ku lug leeyihiin falal amni darro oo ka dhacay degmadaasi.
Taliyaha Saldhiga Booliska degmada Wadajir Xasan Cali Xasan oo la hadlay warbaahinta ayaa u sheegay in ujeedka howlgalka la sameeyay uu ahaa mid lagu doonayay in lagu xaqiijiyo amniga degmada, isla markaana waxa uu xusay in howlgalkaas uu qeyb ka yahay howlgalo kale oo ka socda caasimadda oo lagu xaqiijinayo ammaanka magaalada.
Sidoo kale Taliye Xasan ayaa tilmaamay in howlgalka looga hortagayay kooxaha burcada ah ee dhaca u geysta dadka shacabka ah, Ciyaal weerada iyo ragga hubeysan ee dilalka qorsheysan geysta, isagoona sheegay Taliyaha in howlgalka uu sii socon doono.
Ammaanka magaalada Muqdisho ayaa maalmihii lasoo dhaafay u muuqday mid faraha kasii baxaya, waxaana ka dhacaayay dilal iyo weeraro, ay dad badan ku dhinteen, iyadoona laamaha ammaanka ay mar kasta sameeyaan howlgalo amni xaqiijin ah.
