Madaxweynaha Dowlad Goboleedka Koonfur Galbeed, Mudane Cabdicasiis Xasan Maxamed (Lafta Gareen), iyo Madaxweynaha Galmudug, Mudane Axmed Cabdi Kaariye (Qoor Qoor), ayaa maanta si rasmi ah isku diiwaan geliyay magaalooyinka Baydhabo iyo Dhuusamareeb, iyaga oo si toos ah uga qeyb galay bilaabashada is-diiwaangelinta codbixiyeyaasha ee doorashooyinka goleyaasha deegaanka.
Hawlgalkan muhiimka ah ayaa si rasmi ah uga bilowday deegaano ka tirsan maamulada Koonfur Galbeed iyo Galmudug, iyadoo shacabka ay si weyn uga qeybgalayaan. Mas’uuliyiin heer gobol iyo heer degmo, odayaal dhaqameedyo, dhalinyaro, iyo haween ayaa safaf dheer ugu jira sidii ay codkooda u diiwaan gelin lahaayeen, taas oo ka tarjumeysa rabitaanka bulshada ee ku aaddan doorasho xor iyo xalaal ah oo ku saleysan mabda’a hal qof iyo hal cod.
Doorashadan deegaanka oo ah mid taariikhi ah, ayaa loo arkaa tallaabo waaweyn oo lagu xoojinayo hannaanka dimuqraadiyadda dalka, laguna dhiirrigelinayo ka qeybgalka tooska ah ee shacabka ee go’aan ka gaarista hoggaankooda deegaanka.
Sidoo kale, magaalada Muqdisho, gaar ahaan degmooyin kamid ah caasimadda, ayaa ka mid noqonaya goobaha ugu horreeya ee diiwaangelinta laga hirgeliyay, taasoo muujinaysa ballanqaadka dowladda iyo maamullada goboleedyada ee ku aaddan hirgelinta doorashooyin daahfuran oo lagu kalsoonaan karo.
