Madaxweynaha Hirshabeelle Cali Guudlaawe ayaa tacsi tiiraanyo leh u diray qoysaska iyo qaraabada ay ka baxeen Allaha u naxariistee dadkii maanta ku nafwaayay qaraxyadii Al-shabaab ka geysteen degmooyinka Buulo Burde iyo Jalalaqsi ee Gobolka Hiiraan.
Madaxweynaha ayaa ka tacsiyeeyay geerida Guddoomiyihii hore ee degmada Jalalaqsi Marxuum Maxamed Nuur Dabaashe iyo Duqii Degmada Jalalaqsi Marxuum Aadan Maxamed Ciise oo ka mid haa dadkii maanta ku geeriyooday qaraxii ka kacay xarunta degmada Jalalaqsi.
Madaxweynaha ayaa dhanka kale ka tacsiyeeyay qaraxii galabta ka dhacay buundada degmada Buulo Burde oo ay ku geeriyoodeen dad shacab ah, isagoo tilmaamay in Al-shabaab ay damacsanaayeen inay kala jaraan isu socodka dadka ku nool degmada Buulo Burde.
Madaxweyne Cali Guudlaawe Xuseen ayaa Alle uga baryay Mas’uuliyiintii iyo shacabkii ku geeriyootay qaraxyadaasi in uu hoygooda ka yeelo Jannatul Firdowsa, inta ku dhaawacantayna uu Eebbe caafimaad deg deg siiyo.
Qaraxyo Is-miidaamin ah ayaa maanta ka kala kacay degmooyinka Buulo Burde iyo Jalalaqsi ee Gobolka Hiiraan, waxaana ka dhashay khasaaro isugu jiray dhimasho iyo dhaawac, Al-shabaabna ayaa mas’uuliyada qaraxyadaasi sheegatay .
