Muqdisho(Radio Dalsan):- xili siweyn loo wada sugayay furitaanka kalfadhiga baarlamanka Soomaaliya maadaama lagu wado in la’horgeeyo Ra’iisul wasaaraha cusub ee Soaomaaliya Xasan Cali Kheyre ayaa gudoomiyaha baarlamanka waxa uu shaaciyay waqtiga rasmigaa ee lafurayo kalfadhiga baarlamanka Soomaaliya
Guddoomiyaha Golaha Shacabka Maxamed Sheekh Cusmaan (Jawaari) ayaa ugu baaqay Xildhibaanada Baarlamaanka inay isu diyaariyaan kalfadhiga baarlamaanka oo furmi doona maalinta Arbacada ee soo socota.
“Waxaan ku wargelinayaa Jaalleyaasha Golaha Shacabka in ay u diyaar noqdaan furitaanka Kalfadhiga 1aad ee Golaha Shacabka oo si rasmi ah u furmi doona maalinta arbacada ah ee ay taariikhdu tahay 01-March-2017, saa daraadeed waxaa Xildhibaannada Golaha Shacabka laga doonayaa dhammaan iney diyaar ku yihiin maalintaas xarunta Golaha Shacabka, saacadda 09:00am subaxnimo”
“Waxaa na hor yaala howlo culus oo muhiim u ah dhameystirka dowlad dhisidda Soomaaliya oo qeyb weyn oo ka mid ah ay Xildhibaannada si hufan usoo guteen waxaanna si xushmad iyo qadarin leh uga codsanayaa Xildhibaannada Golaha Shacabka in si aan u gudanno waajibaadkaas na horyaala ay dhowraan waqtiga islamarkaana usoo xaadiraan furitaanka Kalfadhiga 1aad “ayuu hadalkiisa raaciyey Mudane Maxamed Sheekh Cusmaan “Jawaari” Guddoomiyaha Golaha Shacabka.
27kii December 2016 ayey soo bilowdeen howlaha Baarlamaanka Federaalka Soomaaliya xiligaasi oo wadajir loo dhaariyey Xildhibaannada labada aqal balse furitaanka rasmiga ah Kalfhiga 1aad ee Golaha Shacabka ayaa noqonaya maalinta arbacada ee soo socota ee 01-March-2017 waxaana si rasmi ah u furi doona Madaxweynaha Jamhuuriyadda Federaalka Soomaaliya Mudane Maxamed C/laahi Farmaajo.
