Asaaska hoose ee lagu soo xulan karo Golaha Wasiiradda Cusub ayaa maanta loo codeeyey, kadib, markii ay 231-Xildhibaan cod gacan-taag ah ku ansixiyeen Ra’isul-wasaare Xasn Cali Kheyre, oo uu Madaxweyne Farmaajo soo magacaabay.
Tisqaadka Siyaasadda ee Ra’isul-wasaare Kheyre ayaana noqon doonta Halbeegga lagu qiimeyn doono Golaha Wasiiradda ee uu soo xulanayo iyo Waxqabadka ama Dib-u-dhaca ay la soo carar tegi doonaan.
Ra’isul-wasaare Kheyre ayaa la tilmaamay inuu yahay Shaqsi Hawlkar ah, isla markaana galaangal badan u geli jirey  si uu uga miro dhaliyo Hawlihii uu ku caanka baxay ee  Samafalka iyo La-shaqeynta Shirkadaha Sahminta Kheyraadka Dabiiciga.
Haatan, waxa uu ku soo biiray Masraxa Siyaasadda iyo Hoggaaminta Golaha Fulinta ama Xukuumadda oo ah Madal-siyasadeed lafdhabar u ah Golayaasha Hoggaaminta Qaranka.
RW Kheyre oo maanta hor tegay Xildhibanadda BFS waxa uu jeediyey Khudbad uu nuxurkeeda ahaa Is-barasho Furan iyo in Himilada Xukuumadiisa noqon doonto mid halbeeg u ah Karti, Hufnaan, La-xisaabtan, La-shaqeynta Hay’addaha Dastuuriga  iyo La-dagaalanka Musuqa.
Waa hubaal inuu Ra’isulwasaaruhu arar ahaan u sheegay Istaraatijiyadda Xukuumadda uu soo dhisi doono, waxaase is-weydiin mudan nooca ay noqon doonto Xukuumadda cusub (Tiro ahaan iyo Tayo ahaan).
Cod-siinta Xildhibaanadda BFS ee RW Kheyre u muuqatay Farriin lagu sidkay Beerlaxawsi Siyaasadeed, maadaama ay Xildhibaanadda Cod gacan-taag marxabayn leh ku ansixiyeen magacaabistiisa, oo uu kaga xuubsiibtay Xilkii Ra’isul-wasaare magacaaban.
Waa hubaal inay jiraan Xildhibaano badan oo doonaya inay isku qabtaan Xilalka Matanaysan ee Wasiir iyo Xildhibaan, kuwaasi oo xusul-duub iyo xodxodasho ugu jira sidii ay uga mid noqon lahaayeen Xukuumadda cusub ee RW Kheyre.
Xeeldheerayaasha ayaa rumeysan  in loo baahan yahay in la soo dhiso Xukuumad Hufan oo lagula xisaabtami karo Shaqooyinka loo idmaday, laakiinse, haddii uu RW Kheyre door-bido inuu dhiso Xukuumad ka kooban Wasiiro ahna Xildhibaano  waxa ku adkaan doonto sidii uu ula xisaabtami lahaa Wasiir-Xildhibaan.
Magacaabista noocaasi haddii RW lagu camcamiyo  Shaxda noocaasi ah, waxaa hubaal ah inaysan RW wada shaqeyn karin, la-xisaabtami karin Gole Wasiir oo wada Xildhibaano ah.
Waxa uu RW Kheyre u nuglaan doonaa  inuu la kulmo Mucaaradnimo iyo inay ku soo faruurmaan Mooshino khatartooda xambaarsan.
RW Kheyre waxaa la gudboon inuu dib u jaleeco Caqabadihii Mooshinadda la siyaasadeeyo iyo Is-qabqabsigii Madaxweynha iyo Ra’isul-wasaarahiisa iyo Taariikhda  Guud ee Ra’isul-wasaarayaashii isaga kala dambeeyey Xilalkaasi.
Saadaasha Dowladda cusub ayaa laga shanqariyey inay yara dhaami doonto Dowladihii hore, wuxuuna Madaxweyne Farmaajo oo isaga mar Xilka Ra’isul-wasaare soo hayey muddo 6-bilood tilmaamay inuu kalsooni ku qabo inay isaga iyo RW Kheyre wada shaqeyn doonaan Xilli-hawleedka 4-ta sanno ee soo socota.
Saadaasha Fiican ee Madaxweynaha ayaa ah arrin abuuri karta Xasilooni Siyaasadeed, balse, marka xaqasha kale laga qiimeeyo waxaa loo baahan yahay in la ogaado inay si Filan-waa’ isu laba-rogi karto  Jihadda ay ku socoto dabaysha Siyaasadda.
Haddaba, RW Kheyre ayaa laga filayaa inuu soo dhiso Xukuumad wax ka qabata Xalladaha adag ee ka jira dalkeenna, iyadoo hawsha ugu horreyso ee Golaha Wasiiradda lagu jiheynayo Baahiyayaalka Bulshadda, gaar ahaan  Macluusha iyo Abaaraha ay Dadka iyo Duunyadda ku le’anayaan.
Marka la eego Waqiciga Taagan waa loo baahan yahay Ra’isul-wasaare Khabiir ku ah Hawlaha Samfalka Aadminimo, Gargaar-u-Fidinta iyo Kormeerka Nidaamka lagu qeybinayo Gargaarka iyo Xeeladaha looga hortegi karo si aan  loo gacan bidixeynin Yabooha Dhaqaale iyo Gargaarka cunto ee loogu talagalay dadka u nugul in loo gargaaro ee ay Abaaraha iyo Macluusha tabar dhigeen.
Dhinaca kale, Dadka naqdiya Ra’isul-wasaraha ayaa sheega in la magacaabay RW Samafale, balse waxaa hubaal ah haddii RW Kheyre loo madax-baneeyo Hawshiisa inuu soo dhisi karo Xukuumad Karti leh oo wax badan ka qabata Habsanaanta dhan kasta leh ee ka jirta dalkeenna.
Si kastaba ha ahaatee, waxaa isweydiin mudan Maxaa la filan karaa Ansixinta RW Kheyre kadib iyo halka uu u jiheyn doono Xilkiisa iyo Dhaanka 4.5 ee Muraayadda Siyaasadeed u noqotay Beelaha Soomaaliyeed ?
©Radio Dalsan
