Madaxweynaha dowlad Goboleedka Galmudug Axmed Cabdi Kaariye Qooqoor iyo wafdi uu hogaaminayo ayaa Goordhow oo Caawa ah gaaray deegaanka Xeraale ee Gobolka Galgaduud, iyadoo halkaas siweyn loogu soo dhaweeyay.
Safarka Qoorqoor ee Xeraale ayaa waxaa ku wehlinaya Madaxweyne ku-xigeenka Galmudug Cali Daahir Ciid, Wasiiro iyo Xildhibaano, waxaana halkaas kusoo dhaweeyay Mas’uuliyiinta deegaanka iyo qeybaha kala duwan ee Bulshada.
Qoorqoor ayaa inta uu ku sugan yahay Xeeraale waxa uu kulamo kala duwan la qaadan maamulka deegaanka iyo qeybaha kala duwan ee Bulshada, isagoo kala hadli doona baahiyaha jira si wax looga qabto.
Madaxweynaha Galmudug iyo wafdigiisa ayaa kasoo ambabaxay Magaalada Gaalkacyo ee Xarunta Gobolka Mudug oo labadii maalin ee lasoo dhaafay ku sugnaa , wuxuuna xalay halkaas uga qeyb galay Munaasabadda loogu dabaal-degayay 1-da Luuliyo.
