Wararka ka imaanaya gobolka Galgaduud ayaa sheegaya in habeenkii xalay maleeshiyaad hubeysan ay weerar ka fuliyeen tuulo u dhow deegaanka Cadakibir, halkaas oo ay ku dileen laba nin oo midkood ahaa Nabadoon caan ka ahaa deegaanka. Labada marxuum ayaa lagu kala magacaabi jiray Axmed Wehliye Guure iyo Cabdinaasir Maxamuud Cilmi. Maleeshiyaadkii weerarka gaystay ayaa goobta isaga baxsaday kadib dilka.
Xiisad ayaa saaka ka taagan aagga Cadakibir, iyadoo laga cabsi qabo inuu dagaal qarxo. Dhacdadan ayaa daba socota dil kale oo dhowaan ka dhacay Galgaduud, halkaas oo laba wiil oo walaalo ah loo dilay aano qabiil. Xiisadaha iyo weerarada noocan ah ayaa si joogto ah uga dhaca gobolka, iyagoo sababa dhibaatooyin bini’aadantinimo iyo khasaare naf iyo maalba leh. Maamulka iyo odayaasha dhaqanka ayaa dadaal ugu jira sidii loo dejin lahaa xaaladda ka taagan deegaanka.
Weerarada aanooyinka ku saleysan waxay caqabad ku noqdeen nabadeynta iyo horumarka gobolka, iyadoo marar badan la isku dayay in xal waara loo helo colaadaha soo noqnoqda. Odayaasha iyo bulshada deegaanka ayaa sidoo kale ku baaqay marar kala duwan in nabada la qaato,laga fogaado aargudashada iyo si looga hortago dhiig-bax dambe.
