Kooxo hubeysan ayaa gudaha degmada Afgooye ee Gobolka Shabeellaha Hoose waxaa ay ku dileen Guddoomiye Waaxeed ka tirsanaa Maamulka degmadaas, sida ay sheegayaan wararka laga helayo halkaas.
Guddoomiye Waaxeedka ayaa u geeriyooday rasaas uga dhacday qeybaha jirka oo ay ku dhufteen dabley hubeysan, xili uu ku sugnaa xaafad ka tirsan Afgooye, waxaana goobta uu falku ka dhacay ka baxsaday raggii ka dambeeyay dilka.
Al-shabaab oo ka hadashay dilkaas loo geystay Guddoomiye Waaxeedka ayaa magaca Guddoomiyaha la dilay ku sheegtay Cabdullaahi Maxamed oo ka tirsanaa Maamulka degmada Afgooye ee Gobolka Shabeellaha Hoose.
Maamulka Afgooye ayaan weli ka hadlin dilka Marxuum Cabdullaahi Maxamed, waxaana dilkiisa uu kamid noqonayaa dilal qorsheysan oo horey rag hubeysan uga geysteen gudaha degmadaas oo lagu khaarijiyay Mas’uuliyiin iyo Askar Ciidan.
Al-shabaab ayaa inta badan sheegatay dilal iyo weeraro ka dhacay Afgooye oo kamid ah degmooyinka Shabeellaha Hoose ee Maamulka Koonfur Galbeed, waxaana halkaas Saldhiyo Ciidan ku leh Ciidanka dowladda Federaalka.
