Taliska xoogga dalka Soomaaliyeed ayaa faahfaahin ka bixiyay weerar dagaalamayaasha Alshabaab ay ku qaadeen saldhig Ciidanku ay ku leeyihiin Gobalka Shabeellaha Dhexe.
Qarax ismiidaamin ah oo loo adeegsaday gaari laga soo buuxiyay walxaha qarxa ayaa ka dhacay banaanka hore saldhig ay Taliska Ciidanka Xoogga Dalka Soomaaliyeed ku leeyihiin degaanka Biya-cade ee Gobalka Shabeellaha Dhexe, waxaana ka dhashay khasaare sida wararku sheegayaan.
Saraakiisha Ciidanka ma sheegin wax dhimasho ah oo soo gaaray Ciidamada Xoogga Dalka ee halkaas ku sugnaa, hasayeeshee waxaa ay sheegeen in ay dhaawacyo kasoo gaareen illaa 4 Askari oo kamid ahaa ilaaladii saldhiggasi.
Taliyaha Ciidanka Xoogga Dalka Soomaaliyeed Gen Odaywaa Yuusuf Raage oo la hadlay Warbaahinta Qaranka Soomaaliyeed ayaa xaqiijiyay in Ciidamada oo heystay xogta Alshabaab kuna jiray fiijignaan dheeri ah ay ka hortageen qorshaha weerarkaasi ee Al-shabaab.
Dhanka kale Mas’uuliyadda Qaraxaasi ismiidaaminta ah ayaa waxaa sheegtay Al-shabaab, warar lagu faafiyay Baraha Internet-ka ee Al-shabaab ayaa lagu sheegay in Weerarkaasi uu ku dhaawacay Korneel Saneey Cabdulle taliyaha guutada 4aad, waxaana intaa ay ku dareen in ay jiraan Askar ay ku dileen.
Wali ma jirto cid ka madax bannaan labada dhinac oo xaqiijisay khasaaraha Rasmiga ah ee ka dhashay Qaraxaasi Ismiidaaminta ah ee Saaka lagu qaaday Salidhigga Ciidanka Dowaldda ay ku leeyihiin Degaabka Biya cadde ee Gobolka Shabeellaha dhexe.
