Wasiiradda Arrimaha Dibedda ee Dowladaha xubnaha ka ah Urur-gobaleedka IGAD waxay xalay Kulankoodii 72-aad ku yeesheen Aaladda Muuqaalka Wada-sheekeysiga ee Video Conference.
Shirkaasi waxaa guddoominaysay Wasiirka Arrimaha Dibedda ee dalka Sudan, ahna Madaxa Golaha Wasiiradda ee IGAD, Maryama Al-Saadiq Al-Mahdi.
Kulankaasi ka dhacay Aaladda Fogaan Araga waxaa ka qeyb galay Wasiiradda Arrimaha Dibedda ee Dalalka Somalia, Jabuuti, Uganda iyo South Sudan, Wasiiru-dowlaha Arrimaha Dibedda Ethiopia iyo Xoghayaha Maamulka Guud ee Wasaaradda Arrimaha Dibedda Kenya.
Kulankaasi waxaa looga hadlay Dhacdooyinkii ugu dambeeyey ee dalalka xubnaha ka ah Urur-gobaleedka IGAD, gaar ahaan Arrimaha Somalia, South Sudan, Khatarta COVID 19 iyo Doorashooyinkii ka kala dhacay abuuti, Uganda iyo Ethiopia.
Wasiirka Arrimaha Dibedda ee dalka Sudan, ahna Madaxa Golaha Wasiiradda ee Urur-gobaleedka IGAD, , Maryama Al-Saadiq Al-Mahdi oo Kulankaasi ka hadashay waxay soo hadal-qaaday dadaalka Nabadda ee dalalka Somalia iyo South Sudan iyo Soo-celinta Xiriirka Diplomaasiyadeed ee Somalia iyo Kenya.
Dhinaca kale, Xoghayaha Fulinta ee Ururka IGAD, Dr. Workeneh Gebeyu oo ka hadlay Furitaanka Shirkaasi waxa uu ka warbixiyey dadaalka Nabadda ee dalalka Somalia iyo South Sudan, xal-u-helista Colaadaha, Qaxootiga iyo dadka Barakacayaasha iyo Khatarta Xanuunka COVID 19 ku hayo dadka ku nool Mandiqada.
Waxa kale oo uu tilmaamay inay IGAD soo dhaweynayso Heshiiska ay Dowladaha Somalia iyo Kenya ku gaareen inay dib u soo celiyaan Xiriirkooda Diplomaasiyadeed, isagoo dhanka kalena bogaadiyey Doorashooyinka Madaxtinimada ee ka dhacay dalalka Jabuuti iyo Uganda iyo Doorashadii Guud ee ka dhacday Ethiopia.
