Wararka Idaacadda Dalsan ee Magaalada Muqdisho ay ka heleyso degmada Dangoroyo ee Gobolka Nugaal ayaa waxaa ay sheegayaan in halkaas galabta uu ka dhacay Shil gaari oo geystay Khasaaro kala duwan.
Shilkaas ayaa waxaa uu yimid, kadib markii gaari nooca Soomaalida u taqaano Candho-meydle ah uu dul-maray gaari yar oo ah kuwa Raaxada ah, waxaana la sheegay in gaariga weyn uu ku socday xawaare sare.
Dad ku sugan degmada Dangoroyo ayaa soo ku warramay in shilkaas ay ku dhinteen saddex qof oo la socday gaariga raaxada ahaa ,halka qof kalena dhaawac Culus uu soo gaaray, kaasi oo loo qaaday Xarun Caafimaad.
Sawirro laga soo qaaday goobta uu shilka dhacay ayaa muujinayay in si xun uu u dul-maray gaariga weyn midka yar ee Raaxada, wuxuuna gabi ahaan noqday mid burburay, iyadoona ay goobta tageen dad badan oo Gurmad ahaa.
Shilal kala duwan oo geystay Khasaarooyin kala duwan ayaa horey dhowr jeer uga dhacay deegaano ka tirsan Maamulka Puntland, kuwaasi oo inta badan loo sababeeyay Darawalada oo gaadiidka ku wada xawaare sare.
