Qowmiyadaha iyo jinsiyadaha kala duwan ee caalamka ayaan ku kala duwaneyn oo keliya luuqadaha iyo hab dhaqanka.
Waxaa sidoo kale, kala duwa caadooyinka hab nololeedka bulshooyinka kala uwani leeyihiin.
Caadiyan kama aanay dhici jirin Soomaaliya in haweenku tagaan jimicsi iyo jir dhis, halka waddammadan Yurub gaar ahaan Sweden ey middaasi ka tahay wax la caadeeystey.
Caasho oo sannooyinkii u dambeeyey ku dhaqnayd magaalada Boden oo dhacda waqooyiga Sweden ayaa sheegtay in aanay wixii ka horreeyay imaatinkeeda dalkan aanay sameeyn jirin jimicsi.
Mashruuc ay ku mideysanaayeen maamulka degmada Boden iyo xafiiska shaqada ee degmadaasi ayaa u sameeyay tiro dad ah, dhowr saacadood todobaadkii oo ay ku tagaan goobaha lagu jimicsado.
Caasha oo ka mid aheyd dadka nasiibka u yeeshey iney mashruucaa qayb ka noqdaan ayaa mar ay warbixin naga siisay mashruuca, mar aannu khadka telefoonka kula xiriirney, iyada oo ku sugan iskuul ay wax ka barato.
Waxaa noo yimid qolooyin la shaqeeya maamulka degmada oo doonayay in ay toddobaadkii laba jeer noo sameeyaan in aannu tagno goobaha lagu jimicsado.
Caasha oo hadalkeedii sii wadata ayaa sheegtay iney muddada ey ku sugan yihiin goobta jimicsiga sameeyaan tababarro kala duwan, oo uu ka mid yahay orodka:
Waxyaabo badan ayaan sameynaa, mar waan ordaa, mar baaskiilka ayaan kaxeeynaa. Waxaannu sammeeynaa jimicsiyo kala duwan.
Inkasta oo qorshaha mashruuca jimicsigu ku ekaa muddo afar bilood ah, waxay Caasho go’aansatay inay howshaa halkeeda ka sii waddo, iyadoona shaksiyan u iibatay tigidhkii billaha ee goobta jimicsiga, sida ay sheegtay.
Wixii mashruuca ka danbeeyay waxaan shakhsi ahaan u iibsaday kaarka jiimka si aanan , maadaama aan ka dareemay wax badan, sida ay Caasho sheegtay.
Daraasad ay arbacadii toddobaadkan soo bandhigtay jaamacadda jineestikada iyo ciyaaraha – Gymnastik- och idrottshögskolan oo ku taala magaalada Stockholm ayaa lagu ogaaday in dadyowga Iswiidhiska boqolkiiba 46 ee da’da shaqo ku jira ay xaaladooda kartida caafimaad mareyso meel khatar ku ah caafimaadkooda.
Maxaad ku oran lahayd dadka ku dhageeysanaya ee aan tegin goobaha jimicsiga?
Waxaan kula talin lahaa inay fadhiga ka kacaan oo aadaan goobaha lagu jimicsado maadaama uu jimicsigu jir iyo maskax ahaanba u wanaagsan yahay.
Xigasho