Warar dheeraad ah ayaa kasoo baxaya Dagaal u dhexeeyay laba Maleeshiyo beeleed oo Saacadihii lasoo dhaafay ka dhacay deegaan ku yaalla duleedka Magaalada Gaalkacyo ee Xarunta Gobolka Mudug dhinaca Puntland.
Dagaalkaas oo muddo kooban socday ayaa waxaa uu yimid, kadib markii labada Maleeshiyo beeleed uu midkood kasoo horjeestay Baraago biyo ah oo laga qoday deegaan lagu Deeraleey oo ku yaalla duleedka Gaalkacyo.
Inta la xaqiijiyay dagaalka ayaa waxaa uu ku geeriyooday hal qof, halka 3 qof kalena ay ku dhaawacmeen, kuwaasi oo la sheegay inay dhamaantood ay ahaayeen dhinacyada dagaalamay.
Wararka ayaa intaas kusii daraya in xalay deegaanka Deeraleey laga maqlayay rasaas goos-goos ah, In kastoo saakay xaaladda deegaankaas ay tahay mid degan oo aan la maqleyn wax rasaas ah, ayna labada dhinac weli is hor-fadhiyaan.
Si kastaba Dagaalo u dhexeeyay Maleeshiyo beeleedyo oo geystay Khasaarooyin kala duwan ayaa horey dhowr jeer uga ka dhacay deegaano ku yaalla duleedka Magaalada Gaalkacyo dhinaca Puntland, in kastoo markii dambe xal gaaray dagaaladaas.
