Dagaalamayaasha Al-shabaab ayaa fagaaro ku yaalla Degmada Aadan Yabaal ee Gobolka Shabeellaha Dhexe ayaa waxaa ay ku toogteen Nin ay ku eedeeyeen inuu Sirdoon u ahaa dowladda Mareykanka.
Yaasiin Maxamuud Cumar ayaa lagu magacaabi jiray Ninka xukunka dilka toogashada ahaa ee Al-shabaab ku fulisay, waxaana xukuntay Maxkamadda Al-shabaab, isagoona la sheegay inuu qirtay inuu Sirdoon u ahaa Mareykanka.
War qoraal ah oo lagu faafiyay baraha Internet-ka Al-shabaab ayaa waxaa ay u sheegeen in Yaasiin Maxamuud uu soo qaatay qandaraas ah in uu keeno macluumo dhammeystiran oo lagu dili karo xubno ka tirsan Al-shabaabka ku sugan Gobolka Shabeellaha Dhexe.
Al-shabaab ayaa marar badan xukuno dil ah ku fulisay dad ay ku eedeeyeen in ay la shaqeenayeen dowlada federaalka iyo kuwo lagu eedeeyay inay Sirdoon u ahaayeen dowlado shisheeye.
