Guddiga doorashooyinka heer Federaal ayaa Maanta oo sabti ah bilaabay shahaado siinta Xildhibaanada cusub ee Golaha Shacabka Baarlamaanka 11-aad ee dowladda Federaalka Soomaaliya, ee lagu soo doortay Goboleedyada iyo Magaalada Muqdisho.
Guddoomiyaha Guddiga doorashada Muuse Geelle Yuusuf ayaa Xilhibaankii ugu horreeyay siiyay shahaadada Xildhibaannimo ee Baarlamaanka Jamhuuriyadda, kaasi oo noqday Xildhibaan Maxamed Cali Cumar (Caana-nuug) oo kusoo baxay kursiga tirsigiisu yahay HOP#108.
Sidoo kale waxaa shahaadada Xildhibaannimo qaatay Xildhibaan Mustaf Sheekh Cali Cali Dhuxuloow oo kusoo guuleystay kursiga HoP#049, isla markaana deegaan doorashadiisa ay tahay Galmudug.
Xildhibaan Maxamed Nuur Abubakar Shariif Mustafa oo kusoo baxay kursiga Golaha Shacabka ee tirsigoiisu yahay HoP#265 ayaa qaatay shahaadada Xildhibaanimo ee Baarlamaanka Jamhuuriyadda Federaalka Soomaaliya.
Guddiga doorashooyinka heer Federaal ayaa shalay Xildhibaanada cusub ee Baarlamaanka 11-aad ee dowladda Federaalka ku wargeliyay in Maanta ay si rasmi ah u bilaabaneyso shahaado siinta Xildhibaanada cusub ee Golaha Shacabka Baarlamaanka 11-aad ee dowladda Federaalka.
