Xildhibanadaan oo la magac baxay Badbaado Qaran (NSC), waxay Qoraal u direen Dowladda Ethiopia si ay u caddeeyso Mowqifkeeda ku aadan doorkii ay Ciiddanka ka jooga magaalladda Baydhabo ka qaateen Hawlgalkii lagu soo qabtay Mukhtaar Roobow Cali “Abu Mansuur”, iyo in loo soo gudbiyo magaalladda Muqdisho.
Qoraalka waxaa si toos ah loogu diray Danjiraha Ethiopia u jooga Somalia, Jamaaludiin Mustafa Cumar, waxaana Ogeysiis ahaan Qoraalka loogu kala diray: Wasiirka Arrimaha Dibedda ee Ethiopia, Wasiirka Arrimaha Dibedda ee DFS, Wakiiladda QM iyo AU-da u joogta Somalia, Danjirayaasha Maraykanka iyo Britain ku leeyihiin Muqdisho.
Waxaa Xildhibanadu ay Warqadooda ku muujiyeen in uu Ergayga Ururka Midowga Afrika u jooga Somalia, Ambassador Francisco Madeira soo saaray War-saxaafadeed uu ku sheegay inaysan Ciiddanka AMIISOM wax lug ah ku leeyihiin Xarigii Mukhtaar Roobow iyo dhacdooyinkii ay dadka rayidka ah ku geeriyoodeen ee ka dhaca magaalladda Baydhabo.
Dhinaca kale, Xildhibaanadda la magac baxay Badbaado Qaran ee ah kuwii Mooshinka ka gudbiyay Madaxweyne Farmaajo waxa ay Dowladda Ethiopia ka codsadeen inay caddeeyaan doorka ay Ciiddankooda ka jooga Baydhabo ku lahaayeen soo Qabashadii Mukhtaar Roobow iyo in loo soo gudbiyo magaalladda Muqdisho iyo shaqaaqadii ka dhacday Baydhabo ee ay dadka rayidka ku geeriyoodeen.
Qoraalka waxaa lagu sheegay inay Goobjoogayaal xaqiijiyeen Ciiddanka Ethiopia inay ku lug lahaayeen Hawlgalkii lagu xiray Mukhtaar Roobow.
Qoraalka ay Xildhibaanadaasi soo saareen waxaa ku saxiixnaa Afhayeenka Kooxda Xildhibanaadda ee la magac baxay Badbaado Qaran (NSC), Dr. C/fataax Ismaaciil Daahir.