Dagaalamayaasha Xarakadda Al-shabaab waxay maanta Fagaare ku yaalla Degmadda Jilib ee Gobalka J/dhexe ku soo bandhigeen Labo Askari oo Kenyan ah, kuwaasi oo habeen hore lagu soo qabtay Weerar ay Alshabaab ku qaadeen Saldhig Bolis oo ku yaalla Deegaanka Haameey ee duleedka Degmadda Wajeer ee W/bari Kenya.
Boqolaal ka tirsan Dadweynaha ku nool Degmadda Jilib iyo Tuullooyinka ku hareeraysan ayaa isugu soo baxay Fagaaraha lagu soo bandhigay Askarta Kenyanka.
Waxaa kaloo Fagaarahaasi lagu soo bandhigay Gaadiid iyo Hub ay Alshabaab ku soo qabsadeen Dagaalkii ka dhacay Deegaanka Haameey.
Mas’uuliyiin ka tirsan Xarakadda Alshabaab ayaa la hadlay dadkii isugu soo baxay Fagaarahaasi, waxayna uga warbixiyeen Hawlgalkii ay Dagaalamayaasha Alshabaab habeen hore ku qaadeen Saldhigga Boliska ee Deegaanka Haameey ee duleedka Wajeer.
Mas’uuliyiinta Xarakadda waxay carrabka ku adkeeyeen inay sii wadayaan Hawlgalladda ay ka fuliyaan gudaha Kenya, inta ay Ciiddanka Kenya ku sugan yihiin gudaha dalkeenna Hooyo.
Dhinaca kale, Dagaalka ay Alshabaab habeen hore ku qaadeen Deegaankaasi, waxay ku dileen 6 ka tirsan Askartii joogtay Saldhigga Deegaanka Haamey, waxayna nolol ku soo qabteen 2 ka mid ah Askarta Kenyanka.
© Radio Dalsan
