Ninkaasi oo lagu magacaabo Choe In-guk waxaa Aabe u ah Wasiirkii hore ee dalka Koonfurta Kuurya, Choe Dok-shin oo horey ugu sugnaa dalka Waqooyiga Kuurya.
Warbaahinta dowladda Waqooyiga Kuurya waxay sheegtay in Choe In-guk Deganaansho Joogto ah la siiyey, laguna soo dhaweeyey caasimadda dalkaasi ee Pyongyang.
Shabakadda Dowladda Waqooyiga Kuurya ee Uriminzokkiri website waxay soo bandhigtay Sawirada Choe In-guk markii uu Sabtidii hore ka soo degay Garoonka Caalamiga ee Diyaaradaha ee magaalladda Pyongyang.
Ninkaasi baxsaday waxaa Aabe u ah Wasiirkii hore ee Arrimaha Dibedda ee Koonfurta Kuurya, Choe Dok-shin, kadib markii ay isaga iyo xaaskiisa u goosteen Waqooyiga Kuurya sannadkii 1986-dii.
Wsaiirkaasi ayaa baxsaday, kadib, markii ay isku dhaceen Madaxweynihii hore ee dalkaasi, Park Chung-hee, wuxuuna Wasiirka baxsaday geeriyooday sannadkii 1989-kii.
Afhayeenka Wasaaradda Mideynta ee Koonfurta Kuurya waxay xaqiijisay inuu Choe In-guk u baxsaday Waqooyiga Kuurya, isagoo aan wax fasax ah ka qaadanin Dowladda.
Afhayeenka oo Suxufiyiinta maanta kula hadlay caasimadda dalkaasi ee Seoul waxa uu xusay inay baarayaan faafinta safarkiisa ee u uku tegay Waqooyiga Kuurya.
Sida laga so oxigtay Wasaaradda Mideynta ee Koonfurat Kuurya waxa Choe In-guk loo fasaxay inuu 12 Safar oo sharci ah ku tegay dalka Waqooyiga Kuurya tan iyo sannadkii 2001-dii, si uu u soo booqdo qabriga Aabigiisa iyo inuu ka qeyb galo Aaska hooyadiisa oo lagu magacaabi jirey Ryu Mi Yong, taasi oo da’da 95 ku geeriyootay sannadkii 2016-kii.
Si kastaba ha ahaatee, Labada Waddan ee Koonfurta iyo Waqooyiga Kuurya waxay kala go’een muddo haatan laga joogo 70-sanno, kadib, markii uu dhex maray dagaal socday muddadii u dhexeysay sannadihii 1950-kii ilaa 1953-kii.
Tan iyo markii uu dhamaaday Dagaalkii Labada Kuurya, in ka badan 30,000 oo qof oo ku noolaa dhanka Waqooyiga Kuurya ayaa waxay u soo baxsadeen Koonfurta Kuurya, kadib, markii ay dhaqaale xumo iyo caburin siyaasadeed kala kulmeen Madaxda Waqooyiga Kuurya oo ku dhaqma Mabda’a Shuucinimadda.
