Madaxweyne ku-xigeenka Puntland Axmed Cilmi Cismaan Karaash ayaa dhawaan xilka qaadis ku sameeyay saddex kamid ah Wasiirada Maamulkaas, isagoo kuwo cusub magacaabay, balse weli Wasiirada cusub ee la magacaabay ayaan xilka la wareegin.
Wasiirka Wasaaradda maaliyadda Puntland Xasan Shire Abgaal oo kamid ah Wasiirada uu xilkii ka qaaday Axmed Karaash ayaa weli shaqadiisa sii wata, wuxuuna shalay wafdi uu hoggaaminayey ay gaareen Magaalada Gaalkacyo ee Xarunta Gobolka Mudug.
Ujeedka safarka Wasiir Xasan Shire Abgaal ee Gaalkacyo ayaa waxaa uu yahay mid la xiriira tababar loo soo xirayo cutubyo ka tirsan Ciidamada Difaaca Puntland oo muddo tababar uga socday Ddugsiga tababarka Gen. Careys ee Magaalada Gaalkacyo.
Wasiirka Maaliyada Puntland Xasan Abgaal ayaa waxaa safarka ku wehlinaayay Taliyaha Ciidamadda Difaac Puntland Gen. Yaasin Cumar Dheer, waxaana Gaalkacyo kusoo dhaweeyay Mas’uuliyiinta Maamulka Gobolka, kan degmada iyo Taliyaasha Ciidan.
Wasiir Xasan Shire ayaa kamid ah Wasiirada Puntland ee aad ugu dhow Madaxweynaha Maamulkaas Saciid Cabdullaahi Deni, kaasi oo xilka qaadis uu ku sameeyay Madaxweyne ku-xigeenka Puntland Axmed Cilmi Cismaan Karaash.