Ugu yaraan 6 qof ayaa ku geeriyootay, halka 8 qof kalena waxaa ay ku dhaawacmeen, kadib markii qarax xoogan uu barqanimadii Maanta ka dhacay Degmada Balad-xaawo ee Gobolka Gedo.
Qaraxaas oo ahaa miino nooca dhulka lagu aaso ah ayaa waxaa uu sigaar ah uga dhacay goob Maqaaxi ah oo ku taalla Suuqa xoolaha ee Degmada Balad-xaawo, waxaana xiligaas ku sugnaa dad la sheegay inay shacab ahaayeen.
Goobjoogayaal oo la hadlay VOA-da ayaa u sheegay inay arkeen Meydadka dadkii waxyeelada kasoo gaartay qaraxaas, iyadoo dadka dhaawacmay la geeyay Isbitaalka weyn ee Magaalada.
Maamulka degmada Balad-xaawo ee Gobolka Gedo ayaa sheegay in xaaladda degmada haatan ay tahay mid degan, isla markaana laamaha amniga ay wadaan howlgalo kala duwan oo amniga lagu xaqiijinayo.
Si kastaba Qaraxaan ayaa waxaa uu kusoo aadayaa, iyadoo qarax miino ah lala eegtay kolonyo uu la socday sii hayaha xilka Wasiirka waxbarashada Soomaaliya Cabdullaahi Goodax Barre, xilli uu marayay inta u dhaxeysa Beled-Xaawo iyo Doolow, waxaana qaraxaas ku dhaawacmay Xildhibaano ka tirsan Golaha Shacabka.