Wararka aan ka heleyno Gobolka Sanaag gaar ahaan Deegaanka Damalla Xagarre ayaa waxaa ay sheegayaan in halkaasi gelinkii dambe ee Maanta uu dagaal xoogan ku dhexmaray Ciidamo kala taabacsan maamulada Somaliland iyo Puntland.
Ciidamada Somaliland ayaa waxaa la sheegay in marka hore weerar ay ku qaadeen Wafdi uu hogaaminayay Wasiirka Waxbarashada Puntland Cabdullaahi Maxamed Xasan xili uu marayay Nawaaxiga deegaanka Degmada Yubbe,isla markaana waxaa halkaasi ka qarxay dagaal muddo kooban socday.
Wararka ayaa intaasi waxaa ay ku darayaan in uu ka dhashay dagaalka Khasaaro kala duwan oo soo kala gaaray labada dhinac,hayeeshee si dhab ah looma xaqiijin karo inta uu la egyahay.
Wararkii ugu dambeeyay ee Caawa aan ka heleyno Gobolka Sanaag ayaa waxaa ay sheegayaan in xaalada deegaanka Deegaanka Damalla Xagarre haatan ay tahay mid degan oo aan wax rasaas ah laga maqleyn,waxaana Ciidanka Somaliland ay dib ugu laabteen dhinaca degmada Yubbe halkaasi oo markii hore ay ka yimideen.
