Maxay ka wada hadleen Sheekh Shariif iyo Madaxweyne Lafta-gareen?

Madaxweynaha dowlad Goboleedka Koonfur Galbeed Soomaaliya Cabdicaiis Xasan Maxamed Lafta-gareen ayaa Caawa kulan la qaatay Guddoomiyaha Midowga Musharaxiinta Madaxweynaha Sheekh Shariif Sh Axmed.

Kulanka ayaa waxaa looga hadlay xaaladihii ugu dambeeyay ee siyaasadda dalka, marxalada kala guurka iyo khilaafka ka taagan doorashada dhaceysa oo weli aan heshiis rasmi ah laga gaarin.

Dhinacyada ayaa sigaar ah uga arrinsaday sidii xal looga gaari lahaa caqabadaha ku hor gudban doorashada iyo qaabka uu furmi lahaa Shirka guud ee Madaxda dowladda Federaalka iyo maamul Goboleedyada ee ka dhacaya Muqdisho.

Sheekh Shariif ayaa Madaxweyne Cabdicaiis Xasan Maxamed Lafta-gareen u sheegay in muhiim ay tahay in kaalintiisa uu ka qaato dadaalka loogu jiro sidii dalka ay uga dhici laheyd doorasho xor ah oo heshiis lagu wada yahay, isla markaana laga wada qeyb qaato.

Madaxweynaha Koonfur Galbeed ayaa muddooyinkan kulan la qaatan Madaxweynihii hore ee Soomaaliya Sheekh Shariif Sh Axmed, waana kulankiisii ugu horreeyay ee muddo kadib la yeesho Shariifka.

Waxaa Maanta kahad galay shirar maalmihii lasoo dhaafay u socday Madaxweyneyaasha dowlad Goboleedyada dalka, waxaana Madaxda ay isku fahmi waayeen qodobka ah Ajendaha Shirka Madaxda ee la filayo inuu ka dhacdo Teendhada Afisyooni ee Muqdisho.