Faah faahin:-Carruur Dhimasho iyo dhaawac ku noqotay walxo Qarxa oo ay ku ciyaarayeen

Wararka aan ka heleyno Magaalada Guriceel ee Gobolka Galgaduud ayaa waxaa ay sheegayaan in daqiiqado kahor uu Magaaladaas ka dhacay qarax ka dhashay haraadiga walxo qarxa oo ay ciyaarayeen Carruur yaryar.

Carruurta ayaa waxyaabaha qarxa kasoo qaaday aaga Xarunta Jaamacadda ee Guriceel, iyagoona garaacay, kadibna ku qaraxday Carruurtaas, isla markaana waxaa ka dhashay khasaaro isugu jira dhimasho iyo dhaawac.

Inta la xaqiijiyay saddex Carruur ah ayaa goobta ku geeriyootay, halka 2 Carruur kalena iyo hooyada dhashay ay ku dhaawacmeen qaraxa, kuwaasi oo la geeyay Xarun Caafimaad oo ku taalla Magaalada Guriceel ee Gobolka Galgaduud.

Wararka ayaa intaas waxaa ay kusii darayaan iyo Carruurta geeriyootay iyo kuwa dhaawacmay ay isku qoys ahaayeen, waxaana goobta uu falku ka dhacay tegay Ciidamo Boolis iyo qaar kamid ah dad ku sugnaa meel aan halkaas ka fogeyn.

Magaalada Guriceel ee Gobolka Galgaduud ayaa waxaa dhawaan ka dhacay dagaalo xoogan  oo u dhexeeyay Ciidanka dowladda Federaalka, kuwa Maamulka Galmudug oo isku dhinac ah iyo Ciidanka Ahlusunna oo markii dambe isaga baxay Magaaladaas.