DEG DEG:-Farmaajo oo shaqo joojin ku sameeyay Ra’iisul Wasaare Rooble

Madaxweynaha muddo xileedkiisa dhammaaday ee Maxamed Cabdullaahi Farmaajo ayaa shaqo joojin ku sameeyay Ra’iisul Wasaaraha Xukuumadda Federaalka ee xilgaarsiinta Maxamed Xuseen Rooble.

Wareegto uu soo saaray Farmaajo Goordhow oo xili saq dhexe ah haatan ayaa waxaa uu shaqada uga joojiyay Rooble, waxaana uu ku eedeeyay inuu soo galay raad musuqmaasuq iyo ku takrifal dhul ay leeyihiin Ciidanka Xoogga dalka.

Farmaajo ayaa sidoo kale Ra’iisul Wasaaraha ka hakiyey awoodaha uu leeyahay inta uu socoto baarista ay wadaan Guddiga loo xilsaaray kiiska lagu eedeeyay ee ah inuu soo galay tuhun la xiriira ku takrifal dhul ay leeyihiin Ciidanka Badda.

Xubnaha kale ee Golaha Xukuumadda Soomaaliya ee xilgaarsiinta ayuu Maxamed Cabdullaahi Farmaajo faray inay sii wadaan waajibaadkooda shaqo, si waafaqsan shuruucda iyo xeerarka dalka..

Hoos ka Akhriso Wareegtada uu soo saaray Farmaajo, waxayna u qorneyd sidaan:

Madaxweyne Maxamed Cabdullaahi Farnaajo

Markuu arkay qodobka 87aad ee Dastuurka KGM ah ee dalka kaas oo tilmaamaya inuu yahay ilaaliyaha iyo horumariyaha mabaadii’da asaasiga ah ee Dastuurka;

Markuu tixraacay wareegtadii uu soo saaray 18kii Jannaayo 2018 ee la xiriirtay ilaalinta dhulalka danta guud si waafaqsan qodobka 43aad ee Dastuurka KMG ee dalka;

Markuu arkay xeerkii uu ku mamnuucay ku takrifalka iyo musuqmaasuqa dhulalka danta guud ee xilliyada doorashada ee soo baxay 27kii Oktoobar 2021;

Markuu ogaaday in Ra’iisul Wasaaraha uu soo galay raad tuhun oo muujinaya inuu ku takrifalay dhul dan guud ah oo leeyihiin Ciidanka Xoogga Dalka Soomaaliyeed;

Markuu arkay in Taliska Ciidanka Xoogga Dalka Soomaaliyeed ay fureen baaris looga gun gaarayo tuhunka la xiriira Musuqmaasuqa dhul dan-guud ah oo ay leeyihiin Ciidanka Xoogga Dalka Soomaaliyeed;

Markuu garwaaqsaday in Ra’iisul Wasaaraha uu saaray cadaadis Wasiirka Gaashaandhigga si loo leexiyo baarista looga gun gaarayo tuhunka la xiriira kutagri-falka dhul dan guud oo ay leeyihiin CXDS;

Markuu arkay in Ra’iisul Wasaaraha uu 26-kii Diseembar 2021, Wasiir cusub usoo baddalay Wasaaradda Gaashaandhigga iyadoo aan la dhamaystirin baaristii socotay taasoo looga gol leeyahay faragelinta baarista socota ee la xiriirta musuqmaasuqa dhul dan guud oo ay leeyihiin CXDS;

Madaxweynaha wuxuu soo saaray go’aamadan;

1-Maadaama Ra’iisul Wasaaraha XFS Mudane Maxamed Xuseen Rooble uu soo galay raad musuqmaasuq iyo ku takrifal hanti dan guud, uuna haatan socdo baaritaan looga gun gaarayo tuhunkaas, waxaa laga joojiyay shaqada iyo awoodaha uu leeyahay Wasiirka Koowaad tan iyo inta baaristaas laga soo gunaanadayo;

2-Xubnaha kale ee Golaha Xukuumadda waxay sii wadanayaan waajibaadkooda shaqo si waafaqsan shuruucda iyo xeerarka dalka;

3-Waxaa lagu adkaynayaa dhammaan masuuliyiinta hay’adaha dowladda inay ka fogaadaan ku takrifalka hantida danta guud, ayna dhawraan shuruucda iyo xeerarka dalka.