Somali-Kenyan ku ganacsada Xaafadda Eastleigh ee Nairobi oo la xiray.

Ganacsade C/salaam Cafiif Shucayb ayaa maanta la soo taagay Maxkamad ku taalla Nairobi, isagoo lagu eedeynayo inuu maalgeliyo falalka Ammaan-xumida ee ka dhaca Degmadda Mandera.

Sarkaal ka tirsan Ciiddanka Boliska Kenya ee la-dagaalanka waxa loogu yeero Argagixisadda (ATPU) ayaa ka codsaday Garsooraha Maxkamadda in muddo-kordhin la siiyo, si ay u soo dhamaystiraan Baaritaanka ay ku hayaan Eedeysanaha.

Sarkaalka oo lagu magacaabo Cyrus Oykade ayaa sheegay inay doonayaan  baaritaanka Faahfaahinta Mobaylka Eedeysanaha oo u usheegay inuu Mobaylkiisa u isticmaalay inuu kula hadlo dad ku sugan Dibedda iyo Gudaha Kenya.

Ganacsade C/salaam Cafiif Shucayb oo goob Ganacsi ku leh Jidka 12-aad ee Xaafadda Eastleigh  waxa uu beeniyey Eedeymaha lagu soo oogay.

Garsoore Benson Nzakyo ayaa oggolaaday inay Boliska soo dhamaystirtaan baaritaankooda, iyadoo la filayo in Dacwaddiisa mar kale loo dhegeysto maalinta Jimcaha ee soo socota.

Dhinaca kale, Qoyska Eedeysanaha waxay ku eedeeyeen Madaxda Degmadda Mandera inay maleegeen eedeymaha been abuurka ee loo haysto Ganacsade C/salaam Cafiif Shucayb oo Xoghaye ka ah Hay’ad Aan Dowlai Ahayn oo lagu magacaabo Kagbal Foundation oo ka hawlgasha Mandera.

Ganacsadaha ayaa la sheegay inay Boliska ATPU bishan 19-dii ka soo qabteen Dhismaha Eastleigh  Mall ee magaalladda Nairobi, wuxuuna haatan ku xiran yahay Saldhigga Boliska ee Muthayga ee magaalladda Nairobi.

Abdisalam Afif Shueb ABDISALAM AFIF 3

©Radio Dalsan