Kanada oo ka laabatay qorshe lagu soo masaafurin lahaa Muwaadin Soomaali ah

Salah Awil Abdullahi oo 26-jir ah ayaa ka badbaaday qorshe looga soo tarxiili lahaa dalka Kanada, kadib, markii la sheegay inay noloshiisa khatar geli karto haddii lagu celiyo dalkiisa hooyo.

Maxkamadda Federalka ee dalka Kanada ayaa ku gacan-sayrtay qorshaha lagu soo masaafurin lahaa ninkaasi oo ay Boliska Kanada u aqoonsan yihiin nin taariikh dheer ku leh Dembiyadda.
Ninkaasi oo sannadkii 2005-tii tegay Kanada, kuna nool magaalladda Metro Vancouver ayaa waxaa lagala noqday Deganaanshaha dalka Kanada, kadib, markii uu noqday Dembiile aan u hoggansamin Sharuucda dalkaasi.

Garsoore Russel Zinn ayaa ka digay in la masaafuriyo Salah Awil Abdullahi, oo uu tilmaamay inuusan Qoys iyo Ehel ku lahayn Somalia, isla markaana xitaa uusan la xiriirin Aabihiisa oo ku nool Somalia.

“Aabihiisa waxa uu ku nool yahay gudaha Somalia, laakiin wax xiriir ah lama samaynin tan iyo sannadkii 2007-dii, mana yaqaano halka ay Aabihiisa, Adeeradiisa iyo Habar-yaraashiisa kaga nool yihiin Somalia” ayuu yiri Garsoore Russsel Zinn.

Eedeysanaha oo ah Dareewal kaxeeya Wiishka nooca “Forklift”-ga ee ka dhex shaqeeya Dekeddaha  ayaa la sheegay inuu yahay Nin aad u caba Khamriga, isla markaana dhaawac ka qaba maskaxda, kadib, markii uu jug siiyey Bas bishii September ee sannadkii 2013-kii.

Dhinaca kale, Garsoore Russel Zinn  waxa uu ka digay haddii Salah Awil Abdullahi dib loogu celiyo Somalia inuu khatar ugu jiro in loo dilo isaga oo ah  nin gaal oo reer Galbeed ah, waa sida uu hadalka u dhigay Garsoorahaasi.

Xigasho: Vancouver Sun

© Radio Dalsan