(Falaanqeyn) Muxuu isku casilay Afhayeenka Xukuumadda Federalka Somalia ?

Ridwaan Xaaji C/weli ayaa waxa uu shalay si rasmi ahaan isaga casilay xilkii Afhayeenka Xukuumadda Federalka Somalia.

Hadal qoraal oo uu soo dhigay bartiisa Facebook ayaa waxa uu ku sheegay inuu sababo isaga u gaar ah isaga casilay xilkaasi.

Ma cadda sababaha rasmiga ee uu isku casilay Ridwaan Xaaji C/weli oo isaga horey ula soo shaqeeyey Ra’isul-wasaraayaashii hore ee Dowladda Federalka Somalia (Cabdi Faarax Shirdoon “Saacid” iyo C/weli Sheekh Axmed Maxamed).

Hadal-haynta ugu weyn ee la isla dhex marayo ayaa waxay sheegayaan inuu Afhayeenku isku casilay, kadib, markii uu qoonsaday iyadoo uu Ra’isul-wasaare Omar Abdirashid Ali Sharma’arke ka gaabsaday inuu ku wehliyo safaradda uu ugu ambabaxo dalalka dibedda.

Dhacdo kale oo iyadana lagu sababayn karo Is-casilaadda Afhayeenkii Xukuumadda Federalka ayaa ah iyadoo uu Ra’isul-wasaare Sharma’arke bartamihii bishan June La-taliyahiisa dhinaca Warfaafinta u magacaabay Garaad Salaad oo isagu horey u ahaa Agaasimaha Warfaahinta ee Xafiiska Raisul  wasaaraha,  lana soo shaqeeyay dhowr Ra’isul-wasaare.

Magacaabistaasi ayaa u muuqata inuu Afhayeen Ridwaan  ka diday, maadaama uu isagu si wadar ahaan u wada hayey Xilalka Afhayeenka Xukuumadda Federalka iyo La-taliyaha Ra’isul-wasaaraha ee dhinaca Saxaafadda.

Xeeldheerayaasha ayaa waxay iyagu ishaarayaan inuu isku casilay Afhayeenkii Xukuumadda Federalka, maadaama uu dareemay in hawlihii uu idmanaa lala soo farageliyey.

Xubno ku dhow Xukuumadda ayaa rumeysan in Borotokool ahaan shaqada uu hayey tahay Afhayeenka is-casilay mid dhaqan dowladnimo ahaan hoos tagta Wasiirka Warfaafinta, ahna  Afhayeenka Guud ee Xukuumadda Federalka Somalia.

Is-casilaadaasi ayaa waxay ku soo beegantay iyadoo ay jiraan dhowr Afhayeen oo  u kala hadla Wasaaraddo ka tirsan kuwa Xukuumadda Federalka, kuwaasi oo ay Bulshadda ku jahwareersan yihiin isbarbar yaacooda.

Si kastaba ha ahaatee, Ridwaan Xaaji C/weli oo isagu ah Saxafi  caan ah, kana soo hawlgalay Warbaahino Maxali iyo kuwo Calaami ah ayaa waxa uu Xilka Afhayeenka Xukuumadda Federalka hayey tan iyo bishii June 23-dii ee sannadkii 2013-kii.

WQ: Ustaad Nuradin Abokor Ahmed