DEGDEG: Dad ku geeriyooday Qarax ka dhacay Xarunta Ciiddanka Boliska Waddooyinka.

Abaarihii 07:55 daqiiqo ee saakayto waxa qarax xooggan lala beegsaday Xarunta Ciiddanka Taraafikadda oo ku yaalla agagaarka Hotelka Jubba ee magaalladda Muqdisho.

Goobjoogayaal ayaa u sheegay Radio Dalsan in gaari laga soo buuxiyey waxyaabaha qarxa lala beegsaday Albaabka weyn ee laga galo Xaruntaasi (Ufficio Traffico).

Qaraxaasi kadib, waxaa la maqalay is-rasaasayn ka dhacday goobtaasi, waxaana la soo weriyey inay jiraan dad ku geeriyooday iyo kuwo ku dhaawacmay qaraxaasi.

Ugu yaraan 6 qof ayaa la sheegay inay ku geeriyootay qaraxaasi, kuwaasi oo badankooda ahaa dad ku shaahayey Maqaaxi ku taalla Albaabka Xarunta uu qaraxu ka dhacay.

Gaadiidka Ambalaasta ayaa la arkayey iyagoo dadka dhaawaca ah u sii gudbinaya Isbitaalladda Muqdisho.

Ciiddan fara badan ayaa gaaray goobta uu ka dhacay qaraxa, waxaana la xadiday isku-socodka dadka iyo gaadiidka isticmaala nawaaxiga Xarunta Taraafikadda.

Wixii ku soo kordha qaraxaasi waan idiin soo gudbin doonaa Insha Allaahu.

©Radio Dalsan