Wafti Ka Socda Hay’adda UNICEF Soomaaliya oo ay hogaaminayso Wafaa Alfadil Madaxa UNICEF Somaaliya ayna qayb ka yihiin madaxda xafiiska Puntland ayaa booqday Cisbitaalka Guud ee Garowe waxaana ku soo dhaweysay agaasimaha Cisbitaalka Hodan Cali Shire, waxaa sidoo kale waftiga kormeerkooda ku wehelinayay agaasimayaasha Qorshaynta iyo Adeega caafimaadka Asaasiga ah ee wasaaradda caafimaadka.
Waxay ugu horay kormeereen dhismaha cusub ee cisbitaalka oo socda waxayna warbixin ka dhagaysteen Engneerka uqaabilsan hay’adda Dhismaha iyo kuwa dhisaya, waxay bogaadiyeen shaqada wanaagsan ee horumarka leh ee ka socda cisbitaalka.
Kadib waxay booqdeen qaybta quudinta iyo daawaynta “stabilization center” waxayna dhakhaatiirta joogtay ka waraysteen sida ay ushaqayso iyo adeegyada laga bixiyo waxay inta ay joogeen kula kulmeen caruur cisbitaalka ku dhashay oo loo samaynayo wado nafaqayn iyo quudin, qaybtoodna ay soo fiicnaadeen.
Hooyooyinka ay kula kulmeen ayay ka waraysteen adeega loo sameeyay waxayna uga warbixiyeen xaalada ilmaha meelaha ay ka yimaadeen iyo adeega loo sameeyay wayna ka mahadceliyeen.
Ugu danbeyn waxay bogaadiyeen adeega cisbitaalka ka socda iyo horumarka laga sameeyay.
Agaasime Hodan Ali Shire ayaa dhankeeda uga mahadcelisay hay’adda UNICEF wada shaqaynta wanaagsan ee kala dhaxaysa Wasaaradda gaar ahaan Cisbitaalka iyo dhismaha quruxda badan ee ay qaybta ka yihiin.
