Madaxweynihii hore ee Soomaaliya ahna Guddoomiyaha Midowga Musharaxiinta Sheekh Shariif Sh Axmed ayaa ka hadlay Qaraxii Is-miidaaminta ee xalay ka dhacay Maqaayad ku taalla meel ku dhow Saldhiga degmada Shangaani ee Gobolka Banaadir.
Sheekh Shariif ayaa umadda Soomaaliyeed la wadaagay murugada iyo tacsida dhalinyaradii qaraxa lagu dilay, isagoona tacsi u diray dhammaan qoysaska dhalinyaradii ku geeriyootay qaraxa oo lala beegsaday Maqaayad laga shaax cabo.
Madaxweynihii hore ee Soomaaliya ayaa qaraxaas ku tilmaamay inuu ahaa musiibo, waxaana dadka ku dhaawacmay oo gaarayay 5 qof uu Alle uga baryay inuu Caafimaad siiyo, kuwaasi oo haatan lagu dabiibayo Xarumo Caafimaad.
“Waxaan umadda Soomaaliyeed la wadaagayaa murugada iyo tacsida dhalinyaradii qaraxa lagu dilay, anigoo marka hore tacsi u diraya dhammaan qoysaska dhalinyaradaas mustaqbalka u ahayd dalka ee naftii haliga qariban oo Shabaab ka tirsan uu ku qarxiyay degmada Shingaani ee magaalada Muqdisho†ayuu yiri Shariifka.
Ugu dambeyn Sheekh Shariif Sh Axmed ayaa hay’addaha amniga dowladda Federaalka Soomaaliya ugu baaqay inay waqtigooda galiyaa ka hortagga weerarada ka dhacaya Caasimadda dalka ee Muqdisho oo ay iska diidaan in Siyaasad lagu mashquuliyo.
Taliska Booliska dowladda ayaa xalay xaqiijiyay in 6 qof oo 4 kamid ah ay ahaayeen dhalinyaro siweyn looga yaqaanay Gobolka Banaadir ay ku geeriyoodeen qaraxii ka dhacay degmada Shangaani, halka 4 qof kalena ay dhaawacyo soo gaareen.
