Wargeyska Maalinlaha ee THE MONITOR ee ka soo baxa Kampala ayaa maanta qoray inay Taliska AMISOM bilaabeen inay Milliterigooda la kulmaan, si ay ula hadlaan Bulshadda Soomaalida, si ay ugu guuleystaan Quluubtooda.
Qorshahan cusub ayey AMISOM ku doonayaan inay ku gaaraan Madaxda Beelaha iyo Muwaadiniinta Caadiga ee Soomaalida, si ay uga saaraan waxa ay Borobogaandada Alshabaab ku sheegeen inay Ciiddanka AMISOM yihiin Gaallo, loona baahan yahay in laga saaro dalka.
Taliyaha Guutada 19-aad ee Ciiddanka Uganda ee hoos tagta Kooxda Dagaalka ee 22 ee ka hawl-gala Deegaanka Buufow ee Gobalka Sh/hoose, Kolonel Lt Robert Nahamya, oo la hadlay Wargeyska The Monitor ayaa sheegay inay Alshabaab ku guuleysteen inay kasbadaan Quluubta dad badan oo Soomaali ah, kadib, markii ay u sheegeen inay Ciiddanka AMISOM doonayaan inay Kirishtaanimo keenaan dalka, waa sida uu hadalka u dhigay.
Kolonel Robert Nahamya waxa uu xusay inaysan sii shaqeyn doonin Dacaayadaasi,wuxuuna intaasi ku daray inay AMISOM Bilowday inay Mujtamaca u sheegaan arrintaasi.
“Eeg, AMISOM waxaa ku jira Muslimiin, waxaana qalad kuugu ah inaad si fudud ugu dagaalanto danno Diimeed” ayuu yiri.
Si kastaba ha ahaatee, Uganda ayaa ahayd dalkii ugu horreeyey ee Ciiddamo u soo daabula Somalia sannadkii 2007-dii, kuwaasi oo ilaa iyo haatan qeyb ka ah Hawlgalka AMISOM.
