Ra’iisul Wasaaraha Xukuumadda Federaalka Soomaaliya ee xilgaarsiinta Maxamed Xuseen Rooble ayaa Maanta oo sabti ah lagu waday inuu safar ku tego Magaalada Garoowe ee Caasimadda Maamulka Puntland, hayeeshee waxaa uu ka baaqday.
Ilo-wareedyo lagu kalsoonaan karo ayaa sheegaya in Ra’iisul Wasaare Rooble uu Madaxweyneyaasha Puntland iyo Jubbaland Axmed Maxamed Islaam Axmed Madoobe iyo Saciid Cabdullaahi Deni ku wargeliyay in uusan Maanta tegi karin Garoowe.
Lama oga sababta keentay in Ra’iisul Wasaaraha ka baaqdo safarkii uu ku aadi lahaa Caasimadda Puntland, mana jiro weli wax war ah oo kasoo baxay Xafiiska Warbaahinta Rooble ee ku saabsan baaqashadiisa.
Madaxweynaha dowlad Goboleedka Jubbaland Axmed Madoobe oo todobaad ku sugnaa Magaalada Garoowe ayaa lagu wadaa inuu isna Maanta ka ambabaxa Magaaladaas, isagoona ku wajahan Magaalada Kismaayo ee Xarunta Gobolka Jubbada Hoose, kadib baashada safarka Rooble.
Axmed Madoobe ayaa la filayay inuu shalay aado Kismaayo, hayeeshee Ra’iisul Wasaare Rooble ayaa Madaxweyne Saciid Cabdullaahi Deni iyo Madaxweynaha Jubbaland ka dalbaday in aysan kala tigi, si ay u yeeshaan saddexdooda kulamo looga hadlayo doorashada Golaha Shacabka.
Ra’iisul Wasaaraha Xukuumadda Federaalka Soomaaliya ee xilgaarsiinta Maxamed Xuseen Rooble ayaa weli ku sugan Magaalada Dhuusamareeb ee Caasimadda Maamulka Galmudug, isagoona halkaas kulamo kala duwan kula yeeshay Madaxweyne Axmed Qoorqoor, Odayaasha dhaqanka iyo Guddiga doorashada Galmudug.
