Warar dheeraad ah ayaa kasoo baxaya qarax sababay dhimasho iyo dhaawac oo duhurnimadii Maanta gaari ay la socdeen samafalayaal u dhashay dalka Turkiga iyo dad kale oo Soomaali ah lagula eegtay deegaanka Garasbaaley ee magaalada Muqdisho.
Qaraxa oo ahaa miino nooca dhulka lagu aaso ah ee laga hago meelaha fog-fog ayaa waxa uu gaariga oo ahaa nooca ay Soomaalida u taqaano Qooqanta uu ku qabsaday, xilli uu marayay xaafadda Igadabagey ee deegaanka Garasbaaley.
Dad ku sugnaa aaga uu qaraxu ka dhacay ayaa laga soo xigtay in miinada ay qabsatay gaariga ay la socdeen samafalayaasha u dhashay dalka Turkiga iyo xubnaha kale ee Soomaalida ahaa, isla markaana uu dhaliyay khasaaro dhimasho iyo dhaawac leh.
Wararka ayaa intaas kusii daraya in waxyeelada ugu badan gaartay ilaalada la socotay samafalayaasha, in kastoo aan si rasmi ah loo ogeyn tirada khasaaraha rasmi ah ee jira, mana jiro wax war ah oo kasoo baxay laamaha ammaanka dowladda Soomaaliya oo ay uga hadlayaan qaraxaasi dhacay.
Ciidamada ammaanka oo markii dambe soo gaaray goobta qaraxa ka dhacay ayaa halkaasi ka qaaday dadkii ku dhaawacmay qaraxa iyo kuwii kale ee ku dhintay, waxaana halkaasi looga tagay gaarigii la qarxiyay oo si weyn u bur buray.
