Qarax Is-miidaamin ah oo Maanta lala beegsaday Dhallinyaro Muqdisho ku qoraneysay Askarnimo

Qarax is-miidaamin ah oo uu fuliyay qof isku soo xiray waxyaabaha qarxa ayaa isku dhex qarxiyay dhallinyaro dooneysay inay qortaan oo ay ku biiraan ciidanka xoogga dalka, qaraxa ayaana ka dhacay afaafka hore ee xerada TurkiSom oo ku taalla magaalada Muqdisho.

Faah faahin laga helayo qaraxaasi dhacay oo ahaa mid xooggan oo jugtiisa laga maqlay inta badan degmooyinka Muqdisho ayaa sheegeysa inuu dhaliyay khasaaro dhaawacyo u badan oo gaaray qaar kamid ah dadkii sugnaa goobta ee xerada tababarka Turkida ee TURKISOM.

Afar qof oo kamid ah dhallinyarada ayaa ku dhaawacantay qaraxa, kuwaasi oo durbadii loola cararay Isbitaal. Qofka qaraxu ku xirnaa ayaa la tilmaamay inuu doonayay inuu dhex galo dhallinyarada oo saf ku jirtay si ay u qortaan Askarnimo, balse uu is-qarxiyey.

Ma jiro wax war ah oo ka soo baxay Hay’addaha Amaanka oo ku aadan khasaaraha ka dhashay qaraxa, ee Maanta oo Axad ah ka dhacay afaafka hore ee xerada tababarka Turkida ee TURKISOM ee Muqdisho, waxaana mas’uuliyada qaraxaasi sheegtay Al-Shabaab.

Al-Shabaab ayaa horay sidaan oo kale qaraxyo ugu weerartay xeryo ciidan oo ku yaalla magaalada caasimadda ah ee Muqdisho, xilli ay ka socotay diiwaangelin ciidan, waxaana ugu dambeeyay weerarkii ka dhacay xerada Kuliyadda Jaalle Siyaasad.

About Dalsan Editor

View all posts by Dalsan Editor