Wararkii ugu danbeeyay Goobo Ganacsi ku yaalla Muqdisho oo la Qarxiyey

Warar dheeraad ah ayaa kasoo baxaya qaraxyo miinooyin ah oo Maanta oo Axad ah ka dhacay magaalada caasimadda ah ee Muqdisho, kuwaasi oo lagu qarxiyay goobo Ganacsi oo ku yaalla wadada 30-ka gaar ahaan agagaarka halka loo yaqaano laba dhagax.

Dad goobjoogayaal ah ayaa waxaa ay kusoo warrameen in qaraxyada ay geysteen khasaaro maaliyadeed oo gaaray goobaha Ganacsi ee la qarxiyey, waxaana la sheegay in xarumahaasi ay ku xirnaayeen kaamirooyinka wax duuba ee CCTV.

Qarax kale oo miino ayaa sidoo kale saakay ka dhacay suuqa Bakaaraha ee magaalada Muqdisho, isla markaana waxaa qaraxaasi lagu xiray goob gaacsi oo kaamiro CCTV horey loogu xiray.

Laba qof oo haween ah ayaa la tilmaamay inay ku dhaawacmeen qaraxii ka dhacay Bakaaraha, kuwaasi oo la sheegay inay goobta ku sugnaayeen, waxaana durbadii loola cararay Isbitaal, si xaaladdooda caafimaad loogu dabiibo.

Si kastaba, maalmihii lasoo dhaafay ayaa waxaa Muqdisho ka dhacaayay qaraxyo miinooyin ah oo lagu qarxinayay goobo Ganacsi oo lagu xiray kaamirooyinka CCTV, kadib markii dowladda Soomaaliya ay Ganacsatada ku amartay inay xirtaan.

Dhinaca kale dagaalamayaasha Al-Shabaab ayaa dhankooda iyana ganacsatada ku amartay in aysan xiran kaamiro , iyagoona hanjabaad adag u jeediyay ciddii xirataa kaamirooyinka wax duuba ee CCTV.

About Dalsan Editor

View all posts by Dalsan Editor