Dowladda Mareykanka ayaa shaacisay in duqeyn ay dhawaan ka fulisay deegaan duleedka ka ah Magalada Kismaayo ee Xarunta Gobolka Jubbada Hoose inay ku dishay xubno ka tirsan dagaalamayaasha Al-Shabaab.
Warsaxaafadeed ka soo baxay Taliska Mareykanka Africa ee (Africom) ayaa waxaa lagu sheegay in 1/10/2018 oo shalay ku beegneed ay duqeyn ka fuliyeen meel 40KM waqooyi bari kaga beegan magaalada Kismaayo ee Gobolka Jubadda Hoose,iyaga oo ka jawaabayay weerar Al-Shabaab ku qaadeen Ciidamo ka tirsan dowladda.
Warsaxaafadeedka ka soo baxay Africom ayaa waxaa lagu sheegay in weerarkaasi oo ahaa mid cirka ah lagu dilay 9 Xubnood oo ka tirsan Al-Shabaab mid kalena lagu dhaawacay.
Sidoo kale Mareykanka ayaa sheegay in duqeyntaas aysan ku waxyeeloobin dad rayid ah kadib baaritaano ay sameeyeen.
Mareykanka ayaa sanadkaan waxa uu kordhiyey weerarada dhinaca cirka ah oo uu la beegsado saldhigyada Al-Shabaab ee koonfurta iyo Bartamaha Soomaaliya,iyada oo mararka qaar ay dad Shacab ah ku waxyeeloobaan.