Madaxweyne Xasan Sheekh oo safarkii 9-aad ugu baxayo dalka dibadiisa & ujeedka

Madaxweynaha Jamhuuriyadda Federaalka Soomaaliya Xasan Sheekh iyo wafdi uu hoggaaminayo ayaa saacadaha soo socda lagu wadaa inay ka dhoofaan Magaalada Muqdisho, iyagoona kusii jeeda magaalada Jeddah ee Boqortooyada Sacuudi Carabiya.

Ilo-wareedyo lagu kalsoonaan karo ayaa xaqiijiyey socdaalka uu Madaxweyne Xasan Sheekh ku aadayo magaalada Jeddah, waxaana ujeedkiisa uu yahay ka qeyb galka shirka Golaha Badda Cas iyo Gacanka Cadan oo ka furmaya Magaaladaas.

Madaxweynaha Jamhuuriyadda Federaalka Soomaaliya Xasan Sheekh Maxamuud ayaa inta uu ku sugan yahay Jeddah waxaa uu kulamo la qaadan doonaa Madax ka tirsan Boqortooyada Sacuudi Carabiya oo ay ka wada hadli doonaan Arrimo kala duwan.

Sacuudiga ayaa sanadkii 2020 aas-aasay Gole ay ku mideysan yihiin dalalka kulaala Badda Cas iyo Gacanka Cadan oo ay ka mid yihiin Sacuudiga, Masar, Jordan, Eritrea, Yemen, Sudan, Jabuuti iyo Soomaaliya.

Sacuudiga ayaa noqon doonta dalkii 9-aad ee uu booqdo Madaxweyne Xasan Sheekh tan iyo markii la doortay 15 May kadib Imaaraadka, Turkiga, Eritrea, Kenya, Jabuuti, Tanzania, Masar iyo Uganda.

About Dalsan Editor

View all posts by Dalsan Editor