Madaxweynaha dowlad Gobooleedka Jubbaland Axmed Maxamed Islaam Axmed Madoobe ayaa Goordhow dib ugu soo laabtay Magaalada Muqdisho, kadib markii shalay safar Deg-deg ah ugu baxay Kismaayo.
Madaxweyne Axmed Madoobe ayaa Magaalada Kismaayo uga qeyb galay Aas qaran oo loo sameeyay Guddoomiyihii rugta Ganacsiga ee Jubbaland Shaafi Raabi Kaahin oo shalay qarax Ismiidaamin ah lagu dilay.
Sidoo kale Madaxweyne Axmed Madoobe ayaa kulan gaar ah lasoo qaatay Sarakiisha Hay’adaha Amniga, isagoo faray inay keenan baaritaanada dhacdooyinkii u danbeeyay ee dhinaca Amniga ah oo ay ugu dambaysay qaraxii Shalay Al-shabaab ay la beegsadeen dad Shacab ah iyo Masuuliyiin kasoo baxay masaajidka qadiim ee Kismaayo.
Madaxweynaha Jubbaland ayaa Magaalada Muqdisho kaga qaybgali doona shirka Dowlada Federaalka ah iyo Dowladaha xubnaha ka ah ee lagaga hadlayo sidii Dalka ay uga dhici lahayd Doorasho la isku raacsan yahay oo waqtigeeda ku dhacda.