Madaxa Xukuumada Galmudug Sheekh Maxamed Shaakir ayaa Magaalada Dhuusamareeb ee Caasimadda Galmudug kula kulmay Saraakiisha Ciidanka Midowga Afrika ee AMISOM ee ku sugan halkaas.
Sheekh Shaakir kulanka uu la qaatay Saraakiisha AMISOM ayaa waxaa qeyb ka ahaa Wasiirka amniga Galmudug Saaqad Sheekh Yuusuf iyo isku xiraha AMISOM iyo Galmudug Kabtan Cabdullaahi Sheekh Xuseen.
Sidoo kale inta uu kulanka socday ayaa waxaa diiradda lagu saaray sidii looga wadashaqeyn lahaa sugida amniga Caasimadda Galmudug ee Dhuusamareeb iyo deegaanada kale ee maamulkaas.
Waxa kaloo kulankaas looga hadlay xoojinta xariirka ka dhexeeya Ciidamada AMISOM iyo laamaha amniga dowlad Goboleedka Galmudug.
Si kastaba Magaalada Dhuusamareeb ayaa waxaa lagu wadaa inay ka dhacdo Doorashada Guddoomiyaha Baarlamaanka iyo mida Madaxweynaha Galmudug, waxaana arrimaha Doorashada gacanta ku heysa dowladda Federaalka Soomaaliya.
