Lord Micahel Howard oo ah Guddoomiyaha Shirkadda Soma Oil and Gas ee dalka Britain ayaa maanta qoraal u diray Golaha Ammaanka ee QM, wuxuuna si kulul u naqdiyey Warbixintii Guddiga QM ee Kormeerka Xayiraadda Somalia iyo Eritrea, wuxuuna sheegay inay Baarayaasha si qaldan u fasireen Shaqada Shirkadda Soma Oil and Gas ay Shidaalka ka baaraan Xeebaha Somalia.
Waxa uu qoray in ay Kormeeryaasha QM soo bandhigeen qalad weyn oo ku aadan Wershadaha Shidaalka.
Waxa uu intaasi ku daray inay Hay’adda La-talinta ee DLA Piper ay Soma Oil and Gas kula taliyeen inay qaadaan Tallaabooyinka ka dhan ah Musuqa.
Lord Micahel Howard waxa uu Lacagaha ay Shirkadiisa bixisay ku tilmaamay mid la heer ah dalalka Horumaray, halkaasi oo ay shaqaalaha u baahan yihiin Tababar, ka hor inta aan laga walaacin Heshiiska marka la helo shidaal badan.
Dhinaca kale, Xafiiska Ka-hortagga Musuqa ee SFO ee dalka Britain ayaa baaritaano ku haya Musuqa lagu soo oogay Shirkadda Soma Gas and Oil oo ku saabsanaa inay boqolaal kun oo Dollar siisay Madax ka tirsan Wasaaradda Batroolka ee Somalia si ay ugu guuleystaan Qandaraaska shidaalka iyo gaaska dabiiciga looga baarayo Xeebaha dalka Somalia.
