Qarax miino nooca dhulka lagu aaso ah ayaa Barqanimadii Maanta ka dhacay agagaarka biyo dega Sii-sii ee ku yaalla inta u dhexeeysa Isgoysyada Sanca iyo Fagax ee Magaalada Muqdisho, waxaana qaraxaas kasoo baxaya warar dheeraad ah.
Qaraxaas ayaa waxaa ka badbaaday Maamulaha Mashruuca dib u dhiska Maamulka Gobolka Banaadir Cumar Xuseen Sheekh, waxaana qaraxaas uu dhacay xili gaari uu la socday Maamulaha uu marayay biyo dega Sii-sii.
Dad goobjoogayaal ah oo la hadlay Idaacadda Dalsan ayaa waxaa ay u sheegeen in Qaraxa, kadib la maqlay rasaas farabadan oo ay fureen Ciidamo ka tirsan kuwa Booliska oo ku sugnaa meel aan sidaas uga fogeyn goobta.
Sidoo kale dadka ayaa waxaa ay inoo sheegeen in qaraxaas ay ku dhaawacmeen laba Askari oo la tilmaamay inay la socdeen gaariga Maamulaha Mashruuca dib u dhiska Maamulka Gobolka Banaadir ee Cumar Sheekh.
Wararka ayaa intaas kusii daraya in maamule Cumar Xuseen uu kusii jeeday xiligii uu qaraxu ka badbaadayay xafiiskiisa shaqo, waxaana goobta uu qaraxu ka dhacay tegay Ciidamo ka tirsan dowladda.
Magaalada Muqdisho ayaa waxaa xiliyada qaarkood ka dhaca qaraxyo miino nooca dhulka lagu aaso ah, isla markaana waxaa qaraxyadaas ka dhasha Khasaaro, iyadoo habeeno kahor qarax miino oo ka dhacay Isgoyska Talaax uu ku dhintay mid kamid ahaa Shaqaalada Wasaaradda Cadaaladda Xukuumadda Soomaaliya.
