Kusimaha Madaxweynaha ahna Madaxweyne ku-xigeenka dowlad Goboleedka Galmudug Cali Dahir Ciid ayaa Shir gudoomiyay Shirka Amniga degmada Cabudwaaq ee Waqooyiga Gobolka Galgaduud ee Maamulkaas.
Shirkaan oo ay ka so qaybgaleen maamulka degmada, Laamaha Amniga degmada, Garsoorka degmada iyo Guddiga wacyigalinta, horumarinta iyo dib u Heshiisinta Cabudwaaq ee uu dhawaan Magacaabay Madaxweyne ku-xigeenka Galmudug.
Shirkaan ayaa waxaa diirada lagu saaray inta uu socday sidii Amniga degmada Cabudwaaq oo hadda so hagaagay sare loogu sii qaadi lahaa, isla markana uu u noqon lahaa mid la isku halayn karo.
Shirkaan oo ay hadalo ka soo jeediyeen dhinacyadii fadhiyay ayaa ugu danbeyn waxaa lagu heshiiyay in maamulka degmada, Laamaha Amniga Dagmada, Garsoorka Dagmada iyo Gudiga Wacyigalinta, Hormarinta iyo Dib u Heshiisinta Cabudwaaq in ay iska kaashada Xasilinta Magaalada iyo hormarinteeda, iyaga kaashanaya Xildhibanada deeganka iyo Wasaaradaha ay quseeyso.
Magaalada Cabudwaaq ee Waqooyiga Gobolka Galgaduud ee Maamulka Galmudug ayaa waxaa dhowr jeer oo horey ka dhacay dilal iyo weeraro salka ku haayey aanooyin qabiil, iyadoona gacanta lagu dhigay dad Magaalada ka geystay dilal qorsheysan.
