Faah faahino dheeraad ah ayaa kasoo Qarax xoogan oo ka dhacay kasoo horjeeday Dekadda weyn ee Magaalada Muqdisho, waxaana jugtiisa qaraxaas laga maqlay inta Degmooyinka Gobolka Banaadir.
Qaraxaas oo ahaa mid loo adeegsaday Gaariga nooca raaxada ah oo laga buuxiyay waxyaabaha qarxa ayaa waxaa lagu weeraray Xarunta Laanta Canshuuraha Booliska Soomaaliya oo ku taalla kasoo horjeeda Dekadda weyn ee Muqdisho.
Dad goobjoogayaal ah oo la hadlay Idaacadda Dalsan ayaa waxaa ay u sheegeen in gaariga waday qaraxa uu si xoog ah ku soo dhaafay Bar Koontarool oo Ciidanka Booliska ku leeyihiin agagaarka Laanta Canshuuraha, hayeeshee markii dambe rasaas lagu furay ayuu gaariga ku qarxay.
Ugu yaraan shan Askari oo ka tirsan Ciidanka Booliska dowladda ayaa ku dhaawacmay qaraxaas, halka uu dhintay ruuxii gaariga waday, waxaana Askarta dhaawacantay loo qaaday Xarun Caafimaad oo ku taalla Muqdisho.
Sawirro laga soo qaaday goobta uu qaraxu dhacayay ayaa lagu arkayay qeyb kamid ah Derbiga Xarunta Laanta Canshuuraha Booliska oo burbur xoogan soo gaaray, sidoo kalena ay dhulka daad-san yihiin Caleen badan oo geed ku yaalla halkaas ah.
Ciidamo ka tirsan kuwa Booliska dowladda Soomaaliya ayaa ku sugan goobta, isla markaana xiray aaga Xarunta Laanta, sidoo kalena wada baaritaano kala duwan, waxaana halkaas ku sugan Wariyeyaal ka tirsan warbaahinta Muqdisho.
