Warar dheeraad ay ayaa kasoo baxaya Qarax miino nooca dhulka lagu aaso ah oo saakay ka dhacay Magaalada Muqdisho gaar ahaan agagaarka Isbitaalka Digfeer ee Degmada Hodan.
Dad goobjoogayaal ah oo la hadlay Idaacada Dalsan ayaa waxaa ay u sheegeen in qaraxaas lala eegtay gaari nooca dagaalka oo ay la socdeen Askar ka tirsan Ciidanka dowladda xili ay marayeen wadada laamiga ah ee Isbitaalka Digfeer.
Khasaaro isugu jira dhimasho iyo dhaawac ayaa lagu soo waramayaa inuu ka dhashay qaraxaas uuna soo gaaray Askartii la socotay gaariga uu qaraxu haleelay iyo dad shacab ah oo xiligaas goobta ka Agdhawaa.
Ciidamo ka tirsan kuwa Booliska Soomaaliya oo ku sugnaa meel aan sidaas uga fogeyn goobta uu qaraxa ka dhacay ayaa tegay halkaas, iyagoona gurmad u sameeyay Askarta iyo dadkii shacabka ahaa ee waxyeelada soo gaartay.
Ilaa iyo hada kama aysan hadlin laamaha amniga dowladda Federaalka Sooamaliya qaraxa miinada ahaa ee saakay ka dhacay agagaarka Isbitaalka Digfeer ee Degmada Hodan ee Gobolka Banaadir, kaasi oo geystay Khasaaro.
