Dowladda Federaalka Soomaaliya ayaa shaacisay tirada dadkii waxyeelada ay kasoo gaartay Qaraxii saakay ka dhacay Isgoyska Ex-Koontarool Afgooye ee Muqdisho, kaasi oo loo adeegsaday gaari laga buuxiyay waxyaabaha Qarrxa
War-saxaafadeed kasoo baxay Wasaarada Caafimaadka iyo Daryeelka Bulshada Xukuumadda ayaa waxaa lagu faah-faahiyay Khasaaraha ka dhashay qaraxaas.
Sidoo kale Warka kasoo baxay Wasaarada Caafimaadka iyo Daryeelka Bulshada ayaa waxaa sheegay in Wasaaradu ay Guddi Dhaqaatiir iyo Howlwadeenno Caafimaad u xilsaartay gurmadka qaraxii ka dhacay Isgoyska Ex-Koontarool Afgooye.
Hoos ka Akhriso Warkasoo baxay dowladda Federaalka
Wasaarada Caafimaadka iyo Daryeelka Bulshada waxay maanta dhan ku howlaneed gurmadka iyo wax u qabashada dadkii dhibaatadu ku gaartay Qaraxii Musiibada ahaa ee ka dhacay Ekis-Kontrool, Afgooye.
Waxaa dhaawacyada loo qaybiyay 7 Isbitaal kuwaasoo isugu jira kuwa Guud iyo kuwa Gaarka loo Leeyahay, halkaas oo loogu fidinayo daryeel caafimaad.
Sidoo kale, waxaa la geeyay isbitaalada maydadka hada la xaqiijiyay oo dhan 79 ruux oo u geeriyooday qaraxii.
Waxaa ku dhaawacmay Qaraxa oo la geeyay isbitaallada 143 qof oo qaba dhaawacyoo kala duwan oo ka soo gaaray qaraxii maanta dhacay iyadoo 127 ka mid ah la jiifiyay Isbitaallada si loogu dabiibo.
Wasaarada Caafimaadka iyo Daryeelka Bulshada waxay u xilsaartay Guddi Dhaqaatiir iyo Howlwadeenno Caafimaad oo heer Wasaaradeed ah oo qaabilsan gurmadka musiibadii maanta dhacday.
Ilaahay ha u naxariisto inta geeriyootay inta dhaawaca ahna Allaah u booga dhayo.
