Magaalada Baraawe ee Caasimadda rasmiga ah ee Maamulka Koonfur Galbeed Soomaaliya ayaa Maanta oo khamiis ah waxaa lagu wadaa inay ka dhacdo doorashada kuraas ka tirsan Golaha Shacabka Baarlamaanka 11-aad ee dowladda Federaalka.
Guddiga doorashada Koonfur Galbeed ayaa shalay doorashada Golaha Shacabka ka bilaabay Baraawe, waxaana halkaas lagu doortay 7 Xildhibaan oo kamid noqday Baarlamaanka 11-aad dowladda Soomaaliya.
Kuraasta doorashadooda Maanta la qabanayo ayaa waxaa ay tirsigoodu kala yihiin HOP080, HOP255, HOP160, HOP150, HOP155 iyo HOP173, isla maraakana waxaa kuraastaas ku tartamaya Musharaxiin dhowr ah oo loo diiwaan-geliyay.
Maamulka Koonfur Galbeed ayaa noqday maamulkii ugu horreeyay ee bilaabay deegaan doorashada labaad ee Golaha Shacabka, halka weli aysan bilaabin maamulada kale ee oo ay ka socoto doorashada Caasimadaha dowlad Goboleedyada.
Ammaanka Magaalada Baraawe ee Gobolka Shabeellaha Hoose ayaa siweyn loo adkeeyay, kadib markii shalay Magaaladaas ay ku dhaceen madaafiic sababay dhimasho iyo dhaawac, waxaana inta la xaqiijiyay ku dhintay afar qof, halka 9 qof kalena ay dhaawacmeen.
