Dib u dhac ku yimid Shirkii Maanta ee Madaxda Dowladda iyo M/Goboleedyada

Waxaa Maanta oo sabti lagu waday inuu Magaalada Muqdisho ee Caasimadda dalka ka furmo Shirka u dhexeeya Madaxda dowladda iyo kuwa maamul Goboleedyda, hayeeshee dib u dhac ayaa ku yimid Shirkaas oo la filayay inuu furmo.

Sababta keentay dib u dhaca Shirka Madaxda ayaa waxaa lagu sheegay inay tahay in Madaxweyneyaasha dowlad Goboleedyada aysan weli soo gaarin Muqdisho, waxaana kaliya ku sugan Caasimadda Madaxweynaha Koonfur Galbeed Lafta-gareen shalay yimid.

Madaxweyneyaasha maamulada Jubbaland, Puntland iyo Galmudug ayaan weli imaan Caasimadda dalka, halka Madaxweynaha Hirshabeelle Cali Cabdullaahi Xuseen Guudlaawe uu safar shaqo ugu maqan yahay dalka Turkiga.

Shirka Madaxda ayaa sida uu qorshahu yahay looga hadli doonaa markii furmo dardar-gelinta heshiiskii 27-kii May 2021 laga gaaray qabsoomida doorashooyinka dalka ka dhaceysa, kadib markii ku dhow sanad uu khilaaf ka taagnaa doorashada.

Madaxda dowladda Federaalka iyo kuwa maamul Goboleedyada ayaa dhawaan kulan ay qadka ZOOM-ka ku yeesheen isku raacay in Maanta oo sabti ah Magaalada Muqdisho uu ka furmayo Shirka, hayeeshee dib u dhac ayaa ku yimid, lamana oga waqtiga uu furmayo

About Dalsan Editor

View all posts by Dalsan Editor